Tababare Sir Alex Ferguson ayaa sheegay in habdhaqankii Luis Suarez ee xilli ciyaareedkii hore inay aheyd mid nasiib darro ah, waxaana uu sheegay inuu rajeynayo in labada kooxood ay iska ilaawaan dhacdooyinkii u danbeeyay marka ay axada ku kulmayaan Old Trafford.

Kulankii xilli ciyaareedkii hore ayaa keentay arimo badan oo muran dhaliyay, iyadoo Suarez lagu eedeeyay inuu cunsurinimo kula kacay Patrice Evra October 2011.

Isagoo ku wargeliyay tababarihii xilligaas Kenny Dalglish inuu salaami doono Evra, ciyaaryahanka reer Uruguay ayaa hadana diiday inuu gacan qaado, taasoo carro badan dhalisay inkastoo Suarez uu raaligelin ka bixiyay markii danbe.

Evra ayaa salaamay Suarez kulankii Anfield ee xilli ciyaareedkan, taasoo haatan keentay in Ferguson uu ku baaqo in la iska ilaawo arintaas ka hor kulanka axada.

“Mar walba waxaa jira wax laga sii hadlo oo ka horeeya kulanka ay ciyaaraan Manchester United iyo Liverpool sababtoo ah taariikhda ka dhaxeysa labada kooxood, waana labada kooxood ee ugu guulaha badan wadanka.” ayuu Sir Alex Ferguson u sheegay Inside United.

“Kulankaan ciyaarta ka hor isaga ayaa la yimaada ajenda u gooni ah oo laga hadlo.

“Sannadkii hore nasiibdarro ayay aheyd habdhaaqankii Luis Suarez. Waxaan rajeynayaa in labada kooxood ay arintaas iska gadaal mariyeen, islamarkaana aan diirada ku heyno kaliya ciyaarta.”