Agaasimaha kooxda PSG Leonardo ayaa sheegay in kooxda boorasada weyn ee dalka Fraansiiska inay awoodo inay soo xerogeliso Cristiano Ronaldo, laakiin waxa uu ka gaabsaday inay si rasmi ah ugu dhaqaaqayaan xiddiga Real Madrid iyo in kale.

Kooxda hogaanka u heysa horyaalka Faransiiska ayaa suuqa lacag xoog leh gelisay tan iyo intii ay iibsadeen milkiilayaasha reer Qatar 2011dii, waxaana ay haatan gaareen wareega 16ka ee Champions League iyadoo uu macalin u yahay Carlo Ancelotti.

Inkastoo Leonardo uu sheegay in wax walba ay macquul yihiin marka ay timaado PSG Iyo heshiisyada suuqa kala iibsiga, hadana waxa uu ka gaabsaday inay doonayaan Ronaldo mustaqbalka dhow.

“PSG waxa ay noqotay koox wax walba ay suurtogal ka yihiin” ayuu yiri Leonardo.

“Laakiin Ronaldo waxa uu wali qandaraas muddo dheer kula jiraa Real Madrid, mana dooneysid inaad sidaas uga tagto Real. Ma jiraan wax rasmi ah. Ma jiraan wax xiriir ah. Laakiin maanta marka aad ka hadasho ciyaaryahan sidiisa oo kale ah oo dhaqaaqaya, waxaa jira afar ama shan kooxood oo awooda inay la wareegaan, PSG haatan qeyb ayay ka tahay.”

Leonardo ayaa hadalkiisa raaciyay inkastoo ay heystaan dhaqaale xad dhaaf ah, hadana inaysan fursad u heysan inay kooxda ku soo jiidaan Lionel Messi.

“Waligiisna kama tagi doono Barcelona.” ayuu yiri Leonardo.