Gumeysiga ayaa xoog ku galay magaalooyin ku yaala Daanta Galbeed waxaana uu dagaal la galay dagaalyahanada wax iska caabinta.

Ciidamada gumeysiga Israa'iil ayaa saaka oo arbaco ah xoog ku galay magaalooyin badan oo ku yaala Daanta Galbeed, taasoo keentay inay isku dhacaan dagaalyahanada wax iska caabinta Falastiiniyiinta.

Ilo wareedyo falastiiniyiin ah ayaa sheegay in ciidamada gumeysiga Israa’iil ay xoog ku galeen xerada Balata oo ku taal bariga magaalada Naablis, oo ku taal waqooyiga daanta galbeed ee la heysto, iyagoo xusay in iska horimaad uu halkaas ka dhacay, kadib markii dagaalyahannada wax iska caabinta falastiiniyiintu ay beegsadeen cagaf-cagaf ay wateen ciidamada gumeysiga.

Israa'iiliyiin, ay ilaalinayeen ciidanka gumeysiga, ayaa sidoo kale xoog ku galay aagga bari ee Naablis.

Gawaarida ciidamada gumeysiga ayaa xoog ku galay xaafadda Nasaal ee bartamaha magaalada Qalqiliya, iyo deegaanka Ra'sal-khamiis ee xerada Shucfaat oo dhanka waqooyi kaga beegan magaalada Qudus.

Dhinaca kale, warbaahinta Israa’iil ayaa sheegtay in labo qof ay ku dhaawacmeen baabuur ku jiiray xaafadda Armoon Hantasif ee magaalada Qudus, waxayna xaqiijisay in darawalkii gaariga la toogtay.

Wargeyska “Israel Today” oo soo xiganaya booliska ayaa sheegay in jiiritaanka ka dhacay Qudus ay u badan tahay shil baabuur.