Xiriirka caalamiga ee taariikhda kubada cagta iyo istaatistikada IFFHS ayaa u dooratay Jose Mourinho tababare kooxeedka ugu fiican sannadka, waana markii afaraad oo uu abaalmarintan ku guuleysto.

Tababaraha reer Portugal ayaa ku guuleystay La Liga iyo Spanish Super Cup sannadkii 2012, waxaana taasi ay keentay in loogu codeeyo tababaraha ugu fiican ee sannadka, abaalmarinta IFFHS oo ah abaalmarin ay aqoonsan tahay FIFA.

Waa markii afaraad oo uu Mourinho ku guuleysto abaalmarintan ay u codeeyaan suxufiyiin adduunka daafahiisa laga soo xulay, isagoo hore ugu guuleystay 2004, 2005, iyo 2010.

Tababarahan oo kaalinta labaad ka galay abaalmarintii tababaraha sannadka ee Ballon d”or ee uu ku guuleystay tababaraha xulka Spain Vicente del Bosque ayaa waxa uu abaalmarintan ku qaaday 101 cod.

Waxaa kaalin labaad soo galay Roberto Di Matteo, halka seddexaad uu soo galay Diego Simeone. Pep Guardiola ayaa isna codeynta ka galay kaalinta afaraad.